ನವದೆಹಲಿ (ವಿಶ್ವ ಕನ್ನಡ ನ್ಯೂಸ್): ಲೋಕಸಭೆಯಲ್ಲಿ ಕೇಂದ್ರ ಸರ್ಕಾರ ಮಂಡಿಸಿದ್ದ ‘ಮಹಿಳಾ ಮೀಸಲಾತಿ ಹಾಗೂ ಕ್ಷೇತ್ರ ಪುನರ್ವಿಂಗಡಣೆ (Delimitation)’ ಜೊತೆಯಾಗಿರುವ ‘ಸಂವಿಧಾನದ 131ನೇ ತಿದ್ದುಪಡಿ ಮಸೂದೆ’ ಭಾರಿ ಹಿನ್ನಡೆ ಅನುಭವಿಸಿ ಬಿದ್ದುಹೋಗಿದೆ. ಚುನಾವಣಾ ಹೊಸ್ತಿಲಲ್ಲಿ ಈ ಮಸೂದೆಯನ್ನು ಸೋಲಿಸುವಲ್ಲಿ ವಿರೋಧ ಪಕ್ಷಗಳು ಪ್ರದರ್ಶಿಸಿದ ಒಗ್ಗಟ್ಟು ಮತ್ತು ಅವರು ಬಳಸಿದ ‘ವಾಟ್ಸಾಪ್ ಗ್ರೂಪ್’ ತಂತ್ರಜ್ಞಾನ ಪ್ರಮುಖ ಪಾತ್ರ ವಹಿಸಿದೆ.
ಮತದಾನದ ಲೆಕ್ಕಾಚಾರ: ಎನ್ಡಿಎಗೆ ಬಹುಮತದ ಕೊರತೆ
ಇದು ಸಂವಿಧಾನ ತಿದ್ದುಪಡಿ ಮಸೂದೆ ಆಗಿದ್ದರಿಂದ ಇದನ್ನು ಅಂಗೀಕರಿಸಲು ಮೂರನೇ ಎರಡರಷ್ಟು (352) ಬಹುಮತದ ಅಗತ್ಯವಿತ್ತು. ಆದರೆ ಆಡಳಿತಾರೂಢ ಎನ್ಡಿಎ ಕೇವಲ 298 ಮತಗಳನ್ನು (ವೈಎಸ್ಆರ್ ಕಾಂಗ್ರೆಸ್ನ 4 ಮತಗಳು ಸೇರಿ) ಪಡೆಯಲು ಮಾತ್ರ ಶಕ್ತವಾಯಿತು. ಇನ್ನೊಂದೆಡೆ 235 ಸದಸ್ಯ ಬಲದ ವಿಪಕ್ಷಗಳ ಮೈತ್ರಿಕೂಟದಲ್ಲಿ 9 ಜನರನ್ನು (ಚುನಾವಣಾ ಪ್ರಚಾರದಲ್ಲಿದ್ದ ಟಿಎಂಸಿಯ 7 ಹಾಗೂ ಅನಾರೋಗ್ಯಕ್ಕೀಡಾದ ಕಾಂಗ್ರೆಸ್ನ 2 ಸಂಸದರು) ಹೊರತುಪಡಿಸಿ ಉಳಿದವರೆಲ್ಲರೂ ಒಗ್ಗಟ್ಟಿನಿಂದ ಮಸೂದೆ ವಿರುದ್ಧ ಮತ ಚಲಾಯಿಸಿದ್ದಾರೆ. ಒಟ್ಟು 230 ಮತಗಳು ಮಸೂದೆ ವಿರುದ್ಧ ಚಲಾವಣೆಯಾದವು.
‘ವಾಟ್ಸಾಪ್’ ಮೂಲಕ ನಿರಂತರ ನಿಗಾ
ಮಸೂದೆಯನ್ನು ವಿಫಲಗೊಳಿಸಲು ವಿಪಕ್ಷಗಳ ಮ್ಯಾನೇಜರ್ಗಳು ಕಳೆದ ನಾಲ್ಕು ದಿನಗಳಿಂದ ನಿರಂತರವಾಗಿ ಶ್ರಮಿಸಿದ್ದರು. ಹಿರಿಯ ನಾಯಕರು ವಾಟ್ಸಾಪ್ ಗ್ರೂಪ್ಗಳನ್ನು ರಚಿಸಿಕೊಂಡು ಕಾರ್ಯತಂತ್ರ ರೂಪಿಸಿದ್ದರು. ಸಂಸದರ ಹಾಜರಾತಿಯನ್ನು ನಿರಂತರವಾಗಿ ಪರಿಶೀಲಿಸುವುದು, ಗೈರುಹಾಜರಾದ ಸಂಸದರನ್ನು ಪತ್ತೆಹಚ್ಚಿ ಅವರು ಸಂಸತ್ ಭವನಕ್ಕೆ ತಲುಪುವಂತೆ ಮಾಡುವುದು ಮತ್ತು ಸರ್ಕಾರದ ದಿಢೀರ್ ನಡೆಗಳಿಗೆ ಕೌಂಟರ್ ನೀಡಲು ಇದೇ ವಾಟ್ಸಾಪ್ ಗ್ರೂಪ್ಗಳ ಮೂಲಕವೇ ನಿರ್ದೇಶನಗಳನ್ನು ರವಾನಿಸಲಾಗುತ್ತಿತ್ತು.
ಖರ್ಗೆ ಖಡಕ್ ಸೂಚನೆ: ‘ಸಭಾತ್ಯಾಗ ಬೇಡ, ತಾಳ್ಮೆ ಕಳೆದುಕೊಳ್ಳಬೇಡಿ’
ಮತದಾನದ ವೇಳೆ ಆಡಳಿತ ಪಕ್ಷದ ಸದಸ್ಯರು ಎಷ್ಟೇ ಪ್ರಚೋದನೆ ನೀಡಿದರೂ, ನಾಯಕರನ್ನು ನಿಂದಿಸಿದರೂ ತಾಳ್ಮೆ ಕಳೆದುಕೊಳ್ಳಬಾರದು ಮತ್ತು ಯಾವುದೇ ಕಾರಣಕ್ಕೂ ಸಭಾತ್ಯಾಗ (Walkout) ಮಾಡಬಾರದು ಎಂದು ಕಾಂಗ್ರೆಸ್ ಅಧ್ಯಕ್ಷ ಹಾಗೂ ರಾಜ್ಯಸಭೆಯ ವಿಪಕ್ಷ ನಾಯಕ ಮಲ್ಲಿಕಾರ್ಜುನ ಖರ್ಗೆ ತಮ್ಮ ಸಂಸದರಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದರು.
“ಯಾಕೆ ಎಲ್ಲರೂ ಇಷ್ಟು ಸುಮ್ಮನಿದ್ದೀರಿ?”: ಸೋನಿಯಾ ಗಾಂಧಿ
ಮಸೂದೆ ಬಿದ್ದುಹೋದ ಹಿನ್ನೆಲೆಯಲ್ಲಿ ಶನಿವಾರ ಬೆಳಗ್ಗೆ ವಿಪಕ್ಷ ನಾಯಕರು ಸಭೆ ಸೇರಿದಾಗ ಕೊಂಚ ಮೌನ ಆವರಿಸಿತ್ತು. ಈ ವೇಳೆ ಮಧ್ಯಪ್ರವೇಶಿಸಿದ ಕಾಂಗ್ರೆಸ್ ಸಂಸದೀಯ ಮಂಡಳಿ ನಾಯಕಿ ಸೋನಿಯಾ ಗಾಂಧಿ ಅವರು, “ಯಾಕೆ ನೀವೆಲ್ಲರೂ ಇಷ್ಟು ಸುಮ್ಮನಿದ್ದೀರಿ?” ಎಂದು ನಗುತ್ತಲೇ ಕೇಳಿದರು. ತಕ್ಷಣವೇ ಎಲ್ಲ ನಾಯಕರು ಸಂಭ್ರಮಾಚರಣೆ ಆರಂಭಿಸಿದರು ಎಂದು ಮೂಲಗಳು ತಿಳಿಸಿವೆ.
ಬಿಜೆಪಿಯ ‘ಮಹಿಳಾ ವಿರೋಧಿ’ ಆರೋಪಕ್ಕೆ ಕೌಂಟರ್
ಮಸೂದೆ ಸೋಲಿನ ಬೆನ್ನಲ್ಲೇ ಬಿಜೆಪಿ, ವಿಪಕ್ಷಗಳನ್ನು ‘ಮಹಿಳಾ ವಿರೋಧಿಗಳು’ ಎಂದು ಬಿಂಬಿಸಲು ಮುಂದಾಗಿದೆ. ಇದನ್ನು ಸಮರ್ಥವಾಗಿ ಎದುರಿಸಲು ವಿಪಕ್ಷ ನಾಯಕರ ಸಭೆಯಲ್ಲಿ ಚರ್ಚಿಸಲಾಯಿತು. ಇದರ ಭಾಗವಾಗಿಯೇ, ದೆಹಲಿಯಲ್ಲಿ ಮೊದಲ ಬಾರಿಗೆ ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರನ್ನು ಮುಂದಿಟ್ಟು ಪತ್ರಿಕಾಗೋಷ್ಠಿ ನಡೆಸಲಾಯಿತು.
“ನಾವು ಮಹಿಳಾ ಮೀಸಲಾತಿ ವಿರೋಧಿಗಳಲ್ಲ, ಮಹಿಳಾ ಮೀಸಲಾತಿಯನ್ನು ತಕ್ಷಣವೇ ಜಾರಿಗೊಳಿಸಬೇಕು. ಆದರೆ ಮೀಸಲಾತಿಯ ನೆಪದಲ್ಲಿ ಹಿಂಬಾಗಿಲಿನಿಂದ ‘ಕ್ಷೇತ್ರ ಪುನರ್ವಿಂಗಡಣೆ’ (Delimitation) ತರಲು ಹೊರಟಿರುವ ಸರ್ಕಾರದ ಕುತಂತ್ರವನ್ನು ಮಾತ್ರ ನಾವು ವಿರೋಧಿಸುತ್ತಿದ್ದೇವೆ” ಎಂಬ ಸ್ಪಷ್ಟ ಸಂದೇಶವನ್ನು ಜನರ ಬಳಿ ಕೊಂಡೊಯ್ಯುವಂತೆ ಜೈರಾಮ್ ರಮೇಶ್ ಸಲಹೆ ನೀಡಿದ್ದಾರೆ. ಇದಲ್ಲದೆ, ತಕ್ಷಣವೇ ಮಹಿಳಾ ಮೀಸಲಾತಿ ಜಾರಿಗೆ ಒತ್ತಾಯಿಸಿ ಸರ್ಕಾರಕ್ಕೆ ಜಂಟಿ ಪತ್ರ ಬರೆಯಲು ವಿಪಕ್ಷಗಳು ನಿರ್ಧರಿಸಿವೆ.
– ವಿಶೇಷ ವರದಿ: vishwakannadanews.com
